desluòc
Par le mardi 22 décembre 2009, - Lien permanent
i a lo perqué, e lo perqué de las paraulas. çò que rosega. i a l’endrech que sabi pas. sabi pas ont soi. qui soi. sai pas. i a lo luòc. l’ont siás. i a l’oblit. i a tot çò e lo demai. i a. i a los perqué e l’enigma dels perqué. i a çò que rosega. i a l’incomunicable. e lo luòc. e lo perqué del luòc, e l’ont del luòc. i a çò que, e çò que non. i a las paraulas e çò que compreni pas. de còps que i a compreni pas las miás paraulas. e sabi pas se s'ausisson. i a çò que comprenes e çò que siás. çò que sèm e çò que sem pas. i a lo lo luòc e l’enluòc, l’enluòc del luòc. e tanben lo luòc de l’enluòc. i a çò que rosega. i a çò que voldriás e çò que es. i a. i a çò que se pòt pas comprendre, que sabem pas e que sauprem pas. i a un e i a l’altre. e l’altre e l’un. i a tanben lo res. i a coma de nuèch dins la nuèch d’enluòc. pluèja. i a de pluèja. de pluèja dins aquest’ altre luòc. creses que i a un altre luòc, un altre luòc a la pluèja de l’enluòc ? o dins la nuèch ? i a çò que veses e qu’es, atanben çò que veses pas. e tanben çò que te negas de véser. coma ieu. i a l’enigma dels univèrses. e l’òme es pas un punt geometric dins l’espaci. totas las linhas s’i juntan, benlèu en un sol luòc. e l’òme es pas un punt, un punt de l’univers. seriá parallele ? e per de qué m’as pausat en un enluòc ? l’enluòc fa mal. t’agrada de far mal ? i a tot aquò, tot aquò dins un res d’enluòc. dins aquesta abséncia. i a lo funambul sul fial e de còps que i a pas que lo fial. e la pluèja del res. i a las paraulas que fan paur, las conjugasons infinidas del desconegut e tanben aquelas del res. los vèrbes al passat. los del present, lo futur es pas. aquò’s la pluèja de la nuèch de res. abséncia. tot çò que se ditz pas per de qué lo sabem pas. aquò’s nosaltres que bastissèm l’univers e qu’o fasem divergir. los paralleles existisson ? las drechas son corbas, per tot luòc. sustot a l’enluòc. qui siás. qui soi. la question. que, que, qué, perqué. lo tot e lo res. e sempre tòrna lo perqué. e l’ont. lo perqué de l’ont. lo luòc e los mots del luòc. tota la paur. la pèrda e la paur de la pèrda. siás una pèrda ? o pluèja ? i a dins nòstre diccionari las paraulas qu’avèm escafadas, aquestas qu’an pas luòc. las del refús e del non-véser. i a tot aquò, e puèi la rèsta. la rèsta tota. la paur. e aquest sabi pas que nos escafa. l’un coma l’altre. i a çò que liga e çò que nega. sèm las negacions nòstras ? i a lo vocabulari del luòcnonluòc. ont m’as pausat. ont siás ? en luòc pausat t’ai ? cèrqui e los mieus uèlhs son barrats, seriás los uèlhs mieus ? obra-te los uèlhs. obra-me als tieus uèlhs. aquel luòc, quan endrech, quun luòc ? ‘quò’s benlèu un envèrs, un nonluòc, un res. sèm de res pel nòstre envèrs?
e qui parla ?
Commentaires
Soi pas ni tu, ni ieu. Soi pas eles ni mai nosautres. O soi pas tot, pas mai que res. Soi pas lo que legís, ni mai lo qu'o escriu. Soi pas mai mòrt que viu ni mai viu que nascut.
Ai dins una man l'ombra e dins l'autra la lutz. De mans ? Ne t'ai milanta ! Ai pas ni nom ni òc : entre tot çò que t'ai e tot çò que t'ai pas, entre tot çò que soi e tot çò que soi pas, e tot çò que deveni, tot çò que ja foguèri, as pas mai que çò vuèg per me veire passar. Ni viu ni mòrt, res non me ten. Res non m'apara ni manten. Soi pas ta puta lenga ni ton rascle silenci !
M'as en ton si begut abans de te saber, m'as en ton nom cregut abans de te voler. E t'imagines pas de me fugir tostemps, de contar d'en pertot, a qual o vòl glopar, qu'existissi pas ges : agait agaitant agaitat, soi la lenha e lo vent e soi lo fuòc brandal, la beluga e la man que fa naisser la fèsta, e la pluèja a la fin qu'o escafa tot per sempre.
M'as pas reconegut ? Coneisses pas qu'aquò ! Soi pas ni tu, ni ieu, ni l'aicí, ni l'enlòc. Cèrca melhor, de longas, coneisses pas qu'aquò !