nòtas sensa temps
Par le mercredi 19 janvier 2011, - Lien permanent
non pas far lo gèste sol, s’agotar dins l’espèra.
a ras de la pòrta l’alfabrega dessecada.
quand tot clau dins l’agach sens cap condicion, que dire mai?
- ... -
far lo compte servís pas de res ; ni de se negar dins las lagremas que recaptas plan sarradas, ni de se crebar l’uèlh e l’altre puèi. lo cercle es estat fargat plan temps fa, tot i es nosat emai lo silenci que daissères escapar e que de longa dins lo cercle se tend.
paraulas, camin, vai-e-venis, pèrdas e tròbas. cap a la sang, a contra-enluòc.
e encara
pas jamai
a cap de tèrra
auriá, diriá, fariá, seriá
tot aquò se conjuga dins l’uèlh del temps, vira, fa lo torn, e tòrna.
ulisses a pas jamai acabat lo viatge, contunha de montar sens fin a la cima d’itaca. sap pas de que i a al cap, a cap d’itaca. se i a un cap al cap. jamai finís. puja, nosa. nosa e puja. lo fial es entre las mans de qui l’espèra pas. pas mai, pas pus. pas.
pesadas.
Commentaires
L'Ulisse, de segur s'es perdut lo cap d'Itaca dins qualque revirada en nimesenc local de las banlegas universitàrias de Lalengo. Pasmens, per qual i sap plan escotar lo silenci, i a pas cap cap a res, ja que descapitat per l'illusion pus mendra, cap uèlh pòt pas saber çò qu'i a d'i veire pas. Pas aprèp pas, los uèlhs m'en tomban, davant l'atupissenta luciditat del cosmic jaumesp. que nos bombarda aital de raionament comic sens i far mèfi. Quin artista ! Bulgar ? Non, pas encara. A posita, segur. Mas vulgar, pas jamai !
Yes, Al,
jaumesp. a un raionament cosmic, l'a sortit del Roman de Flora Chan who n'es un bèl de comic. Quant a la siá luciditat, cal plan remarcar qu'oblida pas res lo jaumesp. ni cap ni cuol. En mai d'aquò a bon uèlh, çò sembla. Tant bon que me demandi se l'auriá pas raubat a qualqua clarvesenta del costat de New Ithaca o de Naucèla e cap e tot.
Bonnie Pedescaleta y Fisterra
L'as demascat lo bolgre! Arri! Arri! Al lenhièr!
St. G.